Hum Dil O Jaan Se KHaridar Hain Kin Ke Un Ke
hum dil o jaan se KHaridar hain kin ke un ke
bais-e-garmi-e-bazar hain kin ke un ke
ye KHuda jaane kisi ko hai KHabar ya ki nahin
hum bhi ek aashiq-e-gham-KHwar hain kin ke un ke
maqtal-e-ishq mein hum roz-e-azal se yaro
bismil-e-gham-za-e-KHun-KHwar hain kin ke un ke
tha jinhen husn-parasti se hamesha inkar
wo bhi ab talib-e-didar hain kin ke un ke
hum ko ayyar samajhte hain ye be-mehr 'nisar'
jo daghabaz hain so yar hain kin ke un ke
Mohammad Amaan Nisar 
(503) Peoples Rate This