Hawa Us Se Kahna
hawa
subh-dam us ki aahista aahista khulti hui aankh se
KHwab ki sipiyan chunne jae to kahna
ki hum jagte hain
hawa us se kahna
ki jo hijr ki aag piti ruton ki tanaben
ragon se ulajhti hui sans ke sath kas den
unhen raat ke surmai hath KHairaat mein nind kab de sake hain
hawa us ke bazu pe likkha hua koi tawiz bandhe to kahna
ki aawargi oDh kar sans lete musafir
tujhe khojte khojte thak gae hain
hawa us se kahna
ki hum ne tujhe khojne ki sabhi KHwahishon ko
udasi ki diwar mein chun diya hai
hawa us se kahna
ki wahshi darindon ki basti ko jate hue raston par
tere naqsh-e-pa dekh kar
hum ne dil mein tere nam ke har taraf
ek siyah matami hashiya bun diya hai
hawa us se kahna
hawa kuchh na kahna
hawa kuchh na kahna
Mohsin Naqvi 
(2970) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544