Kuchh Ab Ke Jang Pe Uski Giraft Aisi Thi

kuchh ab ke jang pe us ki giraft aisi thi

dar-asl tha wahi fateh shikast aisi thi

KHush-amdid nai raushni ko kyun kahti

hamari qaum qadamat-parast aisi thi

hawas-o-hosh koi bhi na rakh saka qaem

hawa-e-taza bhi shoala-ba-dast aisi thi

nafas nafas ko hum apna gawah karne lage

hamare samt sada-e-alast aisi thi

shanaKHt kar na saka aaina-nazar bhi use

har ek shaKH-e-badan laKHt laKHt aisi thi

hazar rang ke jalwon se thi faza mamur

guzishta raat 'mubarak' nashist aisi thi