Ek Baat Par BigDe Gae Na Jo Umr-bhar Mile

ek baat par bigDe gae na jo umr-bhar mile

us se tariq sulh ke kya sulh-gar mile

baham suluk tha pa tere daur-husn mein

ye rasm uTh gai ki bashar se bashar mile

dil mahw-e-chashm-e-yar tha bimar ho gaya

kuchh un parstishon ka bhi aaKHir samar mile

ai nala tu ne sath diya aah ka to kya

ummid kya asar ki jo du be-asar mile

sadma jigar pe pahunche to ho dil mein kyun na dard

kya farq kuchh juda nahin hain dil jigar mile

hum ko hamare tal-e-bad ne Dubo diya

achchhe the gar nasib to kyun chashm-e-tar mile

dhoun sad-ab-e-tegh se ai pamba jo kabhu

daman se tere daman dagh-e-jigar mile

ummid-e-bu mein us ki mile yun saba se hum

jis tarah be-KHabar se koi be-KHabar mile

jo kuchh na dekhna tha so wo dekhna paDa

us bewafa se pahle the kya dekh kar mile

dekhe hunar jo apne hi wo jaane us ka kaam

hum ko to aib dekh ke apne hunar mile

mehr-e-jahan-faroz dikha dun jabin ko main

gar sang-e-astana-e-KHairul-bashar mile

milne se us ki ghaTti hai kya teri shan-e-husn

'azurda' KHasta-jaan bhi mile tu agar mile

(1018) Peoples Rate This

Your Thoughts and Comments

Ek Baat Par BigDe Gae Na Jo Umr-bhar Mile In English By Famous Poet Mufti Sadruddin Aazurda. Ek Baat Par BigDe Gae Na Jo Umr-bhar Mile is written by Mufti Sadruddin Aazurda. Read famous Poem Ek Baat Par BigDe Gae Na Jo Umr-bhar Mile for youth and Student by Mufti Sadruddin Aazurda. Free Download Ek Baat Par BigDe Gae Na Jo Umr-bhar Mile in PDF.