یاس و ہراس و جور و جفا سے الگ تھلگ

یاس و ہراس و جور و جفا سے الگ تھلگ

اک سائباں ہے قہر خدا سے الگ تھلگ

دیکھو اٹھا ہے وہ بھی علامت کے طور پر

دست دراز دست دعا سے الگ تھلگ

پروانۂ ہوا و ہوس ہاں برائے شوق

کوئی مقام شمع وفا سے الگ تھلگ

کب تک رہے گا وحشیٔ احساس و آگہی

نا سازگار آب و ہوا سے الگ تھلگ

مل جائے گا حصار عزیمت کے آس پاس

کرب سکوت آہ و بکا سے الگ تھلگ

صد حادثات خام ہیں عبرت نگاہ میں

تاریخ ساز جرم و سزا سے الگ تھلگ

اس خوف سے نہ سحر بیانی پہ حرف آئے

راہیؔ رہے ہیں چون و چرا سے الگ تھلگ