صد سوغات سکوں فردوس ستمبر آ

صد سوغات سکوں فردوس ستمبر آ

اے رنگوں کے موسم منظر منظر آ

آدھے ادھورے لمس نہ میرے ہاتھ پہ رکھ

کبھی سپرد بدن سا مجھے میسر آ

کب تلک پھیلائے گا دھند مرے خوں میں

جھوٹی سچی نوا میں ڈھل کر لب پر آ

مجھے پتہ تھا اک دن لوٹ کے آئے گا تو

رکا ہوا دہلیز پہ کیوں ہے اندر آ

اے پیہم پرواز پرندے دم لے لے

نہیں اترتا آنگن میں تو چھت پر آ

اس نے عجب کچھ پیار سے اب کے لکھا بانیؔ

بہت دنوں پھر گھوم لیا واپس گھر آ