سالم یقین عظمت سحر خدا نہ توڑ

سالم یقین عظمت سحر خدا نہ توڑ

مایوس ہو کے کاسہ دست دعا نہ توڑ

شیرازۂ حیات بکھر جائے گا مرا

اے سنگ زاد شیشۂ عہد وفا نہ توڑ

کچھ اور ہونے دے رہ منزل کو تیز گام

اے خضر تو ابھی مری زنجیر پا نہ توڑ

تیشے کی ضرب سہہ نہیں سکتا ہر اک وجود

آذر ہر ایک پیکر سنگ انا نہ توڑ

چہرے کی سلوٹوں کا سبب آئنہ نہیں

ناچارگیٔ عمر رخ آئنہ نہ توڑ

اس مطرب حیات میں زندہ ہے راگنی

رک مطربہ ابھی تو یہ ساز صدا نہ توڑ

بیدار ہو نہ جائیں بدن کی ضرورتیں

اے شوق بے پناہ فصیل حیا نہ توڑ

سالمؔ شجاع موت کی ہے آرزو حرام

آئینۂ حیات کو یوں بے خطا نہ توڑ