محاسبہ

اچھا خاصا گھر تھا لیکن اجڑ گیا

والدین کے انتقال کے بعد

دونوں بھائی اپنی لاڈلی اور اکلوتی

بہن کی شادی کر کے

ملک سے باہر چلے گئے

لاہوری آبائی مکان میں

صرف چچا سلطان اکیلے رہتے تھے

جن کی گھنی نورانی داڑھی

خوف خدا سے ہلتی رہتی تھی

پرویز اٹلی میں

دانتوں کے امراض کا ماہر بن کے رہا

اب اس کی قسمت کا ستارہ

برج سکون میں

جگ مگ جگ مگ چمک رہا تھا

ممتاز اسپین میں

جائز اور ناجائز چیزیں

در آمد بر آمد کر کے

رزق حلال اور اکل حرام کماتا تھا

اس کے جاننے والوں میں

کچھ ایسے ویسے لوگ بھی شامل تھے

مگر اپنی اپنی پردیسی دنیاؤں میں

دونوں آرام سے تھے

چھوٹے کے پیہم اصرار

اور قرطبہ غرناطہ کے اسرار

سے ہار کے

بڑا کشاں کشاں چلا آیا تھا

سات برس میں پہلی بار

وہ ساتھ ساتھ چھٹیاں گزار رہے تھے

ناراض اور مواج

پانیوں کے پڑوس میں

شور شرابے والی

گنجان آبادی سے

ذرا ہٹ کر

ایک خوش نما پہاڑی پر

دس بیس مکانات ہوں گے

سب سے اچھا ممتاز کا تھا

ایک روز وہ سیاحی سے

تھکے تھکائے

رات گئے گھر آئے

اپنے لان میں

نیکر پہنے ٹانگ پسارے

پاس پڑے موبائل پر

نظر جمائے کان لگائے

وسکی پیتے رہے

چاند نشے میں تھا

اور سمندر سے

پگھلی چاندی چھلک رہی تھی

ایسا طلسمی منظر اور اتنا آسمان

آہوں نے کبھی نہ دیکھا تھا

لیکن پرویز کے دورے کی

ایک اور وجہ بھی تھی

تیس برس تک

دو روحوں کے شب خانوں میں

عجب طرح کی پاگل نفرت پلتی رہی

اور اپنا زہر اگلتی رہی

وہ بدلے کی آگ میں جلتے

انگاروں پر چلتے رہے

اسی لیے کوئی دس دن پہلے

اس سازش نے جنم لیا تھا

اور ممتاز نے کسی پرانے

کاروباری ''ساتھی'' سے

خون کا سودا کر ڈالا تھا

آج اسی کا سندیسا آنے والا تھا

اوس اترتی رات گزرتی رہی

اچانک موبائل نے سرگوشی کی

بھیڑیا حلال کر دیا گیا

صبح سویرے ٹیلیفون پر

بہنوئی نے بھرائی آواز سنائی دی:

''راتوں رات نامعلوم افراد

چچا جان کا گلا کاٹ کے

بھاگ گئے ہیں

اور پولس تفتیش وغیرہ''

یہ ماں جائے خوش ہو کے

بیتابی سے گلے ملے

بڑی دیر تک گتھے ہوئے

اپنے دلوں کی دھک دھک سنتے رہے

اک ناپاک درندے نے

اپنے معصوم بھتیجوں سے

بد کاری کا ارتکاب کر کے

ان کی سائیکی بدل دی تھی