واقف ہیں خوئے یار سے دیکھے چلن تمام

واقف ہیں خوئے یار سے دیکھے چلن تمام

یک آن غمزہ زن کبھی شمشیر زن تمام

کس سوز‌ اندرون نے تجھ کو کیا فگار

کس شخص واسطے ہے دلا یہ سخن تمام

گل رنگ و لالہ فام و شفق تاب و خوش عذار

یک ماہ نو سے ماند ہوئے سیم تن تمام

سو نامہ بر کو کاہے تھمائیں پیام ہم

مستور ہے نگاہ میں اپنا سخن تمام

رکھا ہے سینت سینت ترا درد دوستا

گرچہ نقب لگایا کیے راہزن تمام

بس اے جمال یار ترا التفات تھا

جوں وا ہوا نگاہ پہ باغ عدن تمام

ہائے وہ پل نہ روک سکے اشک لالہ گوں

احوال شوق جان گئی انجمن تمام