حسن کی بجلیاں الاماں الاماں

حسن کی بجلیاں الاماں الاماں

عشق کی گرمیاں جاوداں جاوداں

باغ میں گر نشیمن جلا کیا ہوا

غم ہے صحرا ہوئے گلستاں گلستاں

کچھ نہ محمل نشیں کا پتہ مل سکا

ہم پھرے ڈھونڈتے کارواں کارواں

باغ عالم میں گر کوئی بجلی گری

روشنی ہو گئی آشیاں آشیاں

ہے یقیناً کوئی بات ایسی کہ تم

ہو تبسم بہ لب شادماں شادماں

ایک دن غنچہ دل بھی کھل جائے گا

آئے گی فصل گل گلستاں گلستاں

کیا اثر کچھ گرانی کا تم پر نہیں

شمسؔ پھرتے ہو کیوں شادماں شادماں