وہی رنگ رخ پہ ملال تھا یہ پتہ نہ تھا

وہی رنگ رخ پہ ملال تھا یہ پتہ نہ تھا

مرا غم بھی شامل حال تھا یہ پتہ نہ تھا

وہی شام آخری شام تھی یہ خبر نہ تھی

وہی وقت وقت زوال تھا یہ پتہ نہ تھا

مجھے کر گیا جو تہی تہی بھرے شہر میں

وہ مرا ہی دست سوال تھا یہ پتہ نہ تھا

مجھے بت بنا کے چلے گئے کہ نہ رو سکوں

انہیں میرا اتنا خیال تھا یہ پتہ نہ تھا

وہ ہوائے مرگ تھی جس سے دل کا دیا بجھا

مرے دل کا بجھنا کمال تھا یہ پتہ نہ تھا

میں مجیبیؔ ڈھونڈوں کہاں اسے وہ کہاں ملے

وہ تو آپ اپنی مثال تھا یہ پتہ نہ تھا