حسیں یادوں سے خلوت انجمن ہے

حسیں یادوں سے خلوت انجمن ہے

خموشی نغمہ زار صد سخن ہے

نگار گل بدن گل پیرہن ہے

دھنک رقصاں چمن اندر چمن ہے

مری دیوانگی پر ہنسنے والو

یہاں فرزانگی دیوانہ پن ہے

مبارک رہرو راہ تمنا

وطن غربت میں ہے غربت وطن ہے

ڈرا سکتے نہیں خونیں اندھیرے

نگاہ بے دلاں ظلمت شکن ہے

خوشی ارزاں ہے بازار جہاں میں

بہائے غم متاع جان و تن ہے

ازل سے وجدؔ ہر قطرے کے دل میں

قیامت خیز طوفاں موجزن ہے