گردش جام نہیں رک سکتی (ردیف .. ے)

گردش جام نہیں رک سکتی

جو بھی اے گردش دوراں گزرے

صبح محشر ہے بلائے ظاہر

کسی صورت شب ہجراں گزرے

کوئی برسا نہ سر کشت وفا

کتنے بادل گہر افشاں گزرے

ابن آدم کو نہ آیا کوئی راس

کئی آذر کئی یزداں گزرے

اے غم یار تری راہوں سے

عمر بھر سوختہ ساماں گزرے

وہ جو پروانے جلے رات کی رات

منزل عشق سے آساں گزرے

غم ہستی کے بیابانوں سے

کچھ ہمیں تھے جو غزلخواں گزرے

غم کے تاریک افق پر عابدؔ

کچھ ستارے سر مژگاں گزرے