کیفیت ہی کیفیت میں ہم کہاں تک آ گئے

کیفیت ہی کیفیت میں ہم کہاں تک آ گئے

بے خودی وہ تھی کہ ان کے آستاں تک آ گئے

وقت کی رو میں بہے تھے جانے کس انداز میں

یہ خبر بھی ہو نہ پائی ہم کہاں تک آ گئے

خود سکون آگہی نے روح کو تسکین دی

ہم بچھڑ کر جب غبار کارواں تک آ گئے

سر‌ فروشان وفا کو بھی نہ چھوڑا عشق نے

مرحلے ساری خطا کے مہرباں تک آ گئے

راہ منزل کی جہاں پہچاننا دشوار تھی

زندگی تیرے قدم ایسے نشاں تک آ گئے

ہر قدم پر ہم کو دنیا روکتی ہی رہ گئی

ایک جذبہ تھا جو تیرے آستاں تک آ گئے

ملنا تھا حسن بیاں کو ایک اظہار خلوص

لفظ و معنی خود بخود اردو زباں تک آ گئے

دیکھنا ہے فیصلہ موج حوادث کا مبینؔ

کشتئ دل لے کے بحر بیکراں تک آ گئے