اپنی خبر نہیں ہے بجز ایں قدر مجھے

اپنی خبر نہیں ہے بجز ایں قدر مجھے

اک شخص تھا کہ مل نہ سکا عمر بھر مجھے

شعلوں کی گفتگو میں صبا کے خرام میں

آواز دے رہا ہے کوئی ہم سفر مجھے

شاید انہیں کا عجز مرے کام آ گیا

جن دوستوں نے چھوڑ دیا وقت پر مجھے

شب کو تو ایک قافلۂ گل تھا ساتھ ساتھ

یا رب! یہ کس مقام پر آئی سحر مجھے

ہنستے رہے فلک پہ ستارے زمیں پہ پھول

اچھا ہوا کہ عمر ملی مختصر مجھے

مدت کے بعد اس نے سر انجمن ضمیرؔ!

دیکھا نگاہ عام سے اور خاص کر مجھے