Bhigi Palken Shauq Ka Aalam Waqt Ka Dhaara Kya Nahin Dekha

bhigi palken shauq ka aalam waqt ka dhaara kya nahin dekha

hanste aansu talKH tabassum miTha ghussa kya nahin dekha

chhalni sine raushan chehre KHunin aankhen rangin daman

ThanDi aahen viran nazren hashr-e-tamanna kya nahin dekha

rah pe pahre nutq pe qadghan shauq ki yurish dil ki dhaDkan

bolti nazren bojhal palken ghamgin chehra kya nahin dekha

soti qismat jagte insan ujDi basti sham-e-farozan

jhuTe qisse ulTi tohmat baat ka banna kya nahin dekha

bikhri zulfen uljhi baaten aankh mein shoKHi lab pe tabassum

khalti kaliyan jhumti Dali hashr sarapa kya nahin dekha

bazm-e-charaghan jhuTi KHushiyan naKHwat-e-saqi tishna-dahani

gardish-e-saghar aalam-e-masti tundi-e-saba kya nahin dekha

phul si bahen larzan sina sans ulajhte bholi baaten

nichi nazren pahli laghzish dil ka taqaza kya nahin dekha

'yawar' hum ko pa na sakoge jaise ab hain aise kab the

dil ki nazakat jurm-e-mohabbat kufr-e-tamanna kya nahin dekha

aaj bhi 'yawar' hanste hanste aankh mein aansu aa jate hain

dard ki maujen KHun ki lahren aag ka dariya kya nahin dekha