Hikayat-e-gurezan

main ki la-intiha waqt ki rahguzar par

sirf ek lamha-e-muKHtasar

main ki ehsas-o-afkar ke bahr-e-zaKHKHar mein

sirf ek qatra-e-muztarib mein ki sahra-e-hasti ki tapti hui ret par

sirf ek zarra sar-nigun

main ki ek wusat kaenat-e-hasin mein

sirf ek nuqta-e-be-sukun

main wo qatra ki jis mein samundar ki betabiyan maujzan hain

wo lamha jo mustaqbil-o-haal-o-mazi ka aaina hai

main wo nuqta ki jo gardish-e-dahr ka aashna hai

main wo zarra ki sahra-e-hasti ki tishna-labi

apne dil mein chhupae

main wo ek jism-e-nazuk ki jo

nasl-e-insan ke dard aur isyan ka bar-e-garan

apne sar par uThae

main wo ek chashm-e-pur-shauq jis ke liye wusat-e-dasht-o-sahra bhi kam thi

main ne phir chand taron par Dali kamanden

aasmanon ke wo jagmagate makin

is anokhi jasarat pe sab muskurae

main ki KHud mahram-e-zauq-e-parwaz

hamraaz sar-e-bulandi

chand taron ki mahfil se nazren churae

main ki KHud saghar-e-shauq

paimana-e-jazb-o-masti

halqa-e-mai-gusaran se daman bachae

main ki KHud jurat-e-ehtiram-e-did

KHud jurat-e-ehtiram

sirf ek jurat-e-arzu par pasheman

main ki KHud sare aalam ke dard-o-alam ki amin

apne zaKHmon ke aatish-nawai pe KHandan

main ki har raaz-e-sar-basta se aashna

main ki aahang-e-hasti ki hamraaz hun

main hun sadiyon ki khoi hui ek sada

main anasir ka TuTa hua saz hun

(617) Peoples Rate This

Your Thoughts and Comments

Hikayat-e-gurezan In English By Famous Poet Zahida Zaidi. Hikayat-e-gurezan is written by Zahida Zaidi. Read famous Poem Hikayat-e-gurezan for youth and Student by Zahida Zaidi. Free Download Hikayat-e-gurezan in PDF.