Kashti

hum likhne wale

wo kahani hain

jo KHizan mein lakkhi jati hai

aur bahaar mein sunai jati hai

aur wo git hain

jo andhere mein gaya jata hai

aur raushni mein

dohraya jata hai

hum ek aisi diwar hain

jo kisi ke raste mein nahin aati

aur ek aisa darwaza

jo hamesha dariya ki taraf khulta hai

aur ek aisi khiDki

jo kabhi bazar ki taraf nahin khulti

hum ek aisa daraKHt hain

jise aap kaT to sakte hain

magar laga nahin sakte

hum us daraKHt ke

kaTe jaane ka afsos

hum us daraKHt mein

phuTne wali konpalon

ki KHushi

hum us daraKHt ka saya

aur hum us ki lakDi se bani hui

ek aisi kashti hain

jis mein bheDiye

safar nahin kar sakte

(698) Peoples Rate This

Your Thoughts and Comments

Kashti In English By Famous Poet Zeeshan Sahil. Kashti is written by Zeeshan Sahil. Read famous Poem Kashti for youth and Student by Zeeshan Sahil. Free Download Kashti in PDF.