KHat

shahr KHat likhta hai

sab se pahle tariKH

yani jis din KHat likha gaya

jagah yani jahan se KHat likha gaya

aur phir waqt

jis waqt shahr ne ye KHat likhna shurua kiya

shayad wo ro raha tha

nili raushnai se likhe gae lafz

jagah jagah se phail gae hain

aur kaghaz itna KHasta hai ki agar KHat ziyaada der Dak mein rahta to shayad

lifafe ke andar hi kaT phaT jata

KHat likhne ke dauran hi

shahr ke sine par

Dher sari goliyan daghi gain

shahr ki aankhon mein

rakh aur barud ke zarre

bhare gae

shahr ko der tak dhup mein baiThna paDa

aur is se bhi ziyaada der

andheron mein rahna paDa

shahr subh se dopahar tak

diwar ke sath laga

khaDa raha

aur Dar ke mare

bahut si baaten likhte likhte rah gaya

shahr wo baaten bhula nahin

us ne likha hai wo apni Diary mein

sab kuchh note kar raha hai

us ne likha hai log is Diary ko

churane ki koshish kar rahe hain

us ne likha wo apni Diary ek din

shahr na jaane kya likhna chahta tha

aur likh nahin saka

tin chauthai KHat likhne ke baad

shahr ka kaghaz shahr ki nili raushnai

shahr ki siyahi shahr ke lafz

sab kuchh KHatm ho kar rah gaya

shahr us KHat ke shurua mein

us shaKHs ka nam likhna bhul gaya

jise wo KHat likhna chah raha tha

aur KHat KHatm karne ke baad

ya shayad is se pahle hi

shahr apna nam bhi bhul chuka tha