KHud-kushi

ek aise sarwey ke mutabiq

jo mere dost

apne dil ko mausul hone wali

ghair-zaruri KHabron ko jama kar ke

murattab kar rahe hain

shahr mein koi KHud-kushi nahin kar raha

mohabbat mein nakaami par finail pine wali laDkiyan

aur naukri na milne par

baDe bhai ke licence-yafta pistol se

KHud-kushi karne wale laDke

bahut din se nazar nahin aae

dupaTTe ka phanda bana kar mar jaane wali

be-aulad dulhanen

aur tawil bimari se tang aa kar

KHud ko jala kar halak karne wale

udheD-umar mariz

napaid ho gae hain

shahr mein ab jis ko bhi KHud-kushi karni ho

use bahut ziyaada tag-o-dau nahin karni paDti

wo bahar nikalta hai

aur thoDi der ke liye

nishana-bazon wali yellow cab ka

intizar karta hai

ya jab us ki saDak ke donon taraf

KHub firing ho rahi ho

wo bila-irada balcony mein ja ke khaDa ho jata hai

jab log KHud-kushi karna chahte hain

yaqin kijiye

kisi jinsi imtiyaz ke baghair

rang, nasl aur zaban ke farq ko KHatir mein na late hue

goliyan har jagah

unhen DhunDh nikalti hain

(646) Peoples Rate This

Your Thoughts and Comments

KHud-kushi In English By Famous Poet Zeeshan Sahil. KHud-kushi is written by Zeeshan Sahil. Read famous Poem KHud-kushi for youth and Student by Zeeshan Sahil. Free Download KHud-kushi in PDF.