Zard Patte The Hamein Aur Kya Kar Jaana Tha

zard patte the hamein aur kya kar jaana tha

tez aandhi thi muqabil so bikhar jaana tha

wo na tha tark-e-talluq pe pasheman to phir

tum ko bhi chahiye ye tha ki mukar jaana tha

kyun bhala kachche makanon ka tumhein aaya KHayal

tum to dariya the tumhein tez guzar jaana tha

ishq mein soch samajh kar nahin chalte sain

jis taraf us ne bulaya tha udhar jaana tha

tujh se hi TuTa bharam rishton ki mazbuti ka

sar pe ilzam tere dida-e-tar jaana tha

KHud ko jab kar hi diya tha teri aandhi ke supurd

phir ye kya jaan ke karte ki kidhar jaana tha

kya KHabar thi ki yahan teri zarurat hogi

hum ne to bas dar-o-diwar ko ghar jaana tha

(683) Peoples Rate This

Your Thoughts and Comments

Zard Patte The Hamein Aur Kya Kar Jaana Tha In English By Famous Poet Zia Zameer. Zard Patte The Hamein Aur Kya Kar Jaana Tha is written by Zia Zameer. Read famous Poem Zard Patte The Hamein Aur Kya Kar Jaana Tha for youth and Student by Zia Zameer. Free Download Zard Patte The Hamein Aur Kya Kar Jaana Tha in PDF.