KHwab Ki Basti Mein Afsane Ka Ghar

KHwab ki basti mein afsane ka ghar

shama ki lau par hai parwane ka ghar

ban gae aaKHir harif-e-baal-o-par

dam ki diwar aur dane ka ghar

aap bhi sang-e-ta'qqul phenkiye

aaina-KHana hai diwane ka ghar

main junun-e-ishq aur sahra-e-gham

tu adu ki bazm begane ka ghar

aql-o-danish ilm-o-irfan fikr-o-hosh

kin hisaron mein hai farzane ka ghar

ho gae gumrah kuchh meri tarah

DhunDte hain shaiKH paimane ka ghar

qismat-e-'tarzi' yahi jagir thi

shahr-e-gham kahiye ki virane ka ghar