عصر حاضر کا جو انسان نظر آتا ہے

عصر حاضر کا جو انسان نظر آتا ہے

بس پریشان پریشان نظر آتا ہے

نفرت‌ و بغض کی مسموم ہوا ایسی چلی

کوچۂ جاناں بھی ویران نظر آتا ہے

مری ہستی کی عمارت بھی گرا سکتا ہے

اس کی آنکھوں میں جو طوفان نظر آتا ہے

زندہ انسان بھی جلتے ہیں چتاؤں میں جہاں

ملک یہ ایسا ہی شمشان نظر آتا ہے

حادثہ کیسا یہ گزرا ہے کہ ہر سو مجھ کو

کرب و آزار کا طوفان نظر آتا ہے

اس قدر بڑھ گئی سفاکئ انساں احسنؔ

جس کو دیکھو وہی حیوان نظر آتا ہے