بہار فکر کے جلوے لٹا دیے ہم نے
بہار فکر کے جلوے لٹا دیے ہم نے
جنون عشق کے دریا بہا دیے ہم نے
فروغ دانش و برہاں کے شعلے بھڑکا کر
توہمات کے خرمن جلا دیے ہم نے
گرا کے درک و بصیرت کی بجلیاں پیہم
تعصبات کے ٹکڑے اڑا لیے ہم نے
بنا کے فکر و تدبر کو خادم انساں
مقدرات کے چھکے چھڑا دیے ہم نے
شعور نقد کی صحت پسندیوں کی قسم
عقیدتوں کے پرخچے اڑا دیے ہم نے
مٹا کے تفرقۂ خاص و عام کی لعنت
حقوق خاص ٹھکانے لگا دیے ہم نے
فتادگان زمیں کا بلند کر کے علم
فلک نشینوں کے پرچم جھکا دیے ہم نے
نئے شعور سے ذہنوں میں بجلیاں بھر دیں
نئی امنگوں سے دل جگمگا دیے ہم نے
گماں حیات پہ ہوتا ہے گیت کی لے کا
کچھ ایسے گیت جہاں کو سنا دیے ہم نے
طلسم توڑ کے جھوٹی حقیقتوں کے تمام
عجائبات کے جادو جگا دیے ہم نے
ورائے چرخ تھے آباد جس قدر فردوس
زمیں کی سطح پہ لا کر بسا دیے ہم نے
بنا کے محنت انساں کو ایک قدر بلند
زمیں پہ چاند ستارے بچھا دیے ہم نے
جلا کے عظمت آدم کی شمع دیرینہ
چراغ دیر و حرم کے بجھا دیے ہم نے
جو درک رکھتے ہیں اختر وہ سمجھیں اور بتائیں
یہ کس شراب کے ساغر لنڈھا دیے ہم نے
اختر انصاری 
(910) ووٹ وصول ہوئے
Bahaar-e-fikr Ke Jalwe LuTa Diye Humne In Urdu By Famous Poet Akhtar Ansari. Bahaar-e-fikr Ke Jalwe LuTa Diye Humne is written by Akhtar Ansari. Enjoy reading Bahaar-e-fikr Ke Jalwe LuTa Diye Humne Poem on Inspiration for Students, Youth, Girls and Boys by Akhtar Ansari. Free Dowlonad Bahaar-e-fikr Ke Jalwe LuTa Diye Humne by Akhtar Ansari in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends