یہ بولے جو ان کو کہا بے مروت

یہ بولے جو ان کو کہا بے مروت

میں کیا تم سے بھی ہوں سوا بے مروت

لقب میرے قاتل کے کیا پوچھتے ہو

ستم گار نا آشنا بے مروت

ان آئینہ رویوں میں ہے وہ ستم گر

بڑا خود غرض خود نما بے مروت

تو وہ کج ادا ہے جو دنیا میں ڈھونڈھیں

نہ تجھ سا ملے دوسرا بے مروت

نہیں اس میں رحم و حیا کچھ وہ قاتل

بڑا سنگ دل ہے بڑا بے مروت

تری چشم پوشی سے آنکھوں میں دم ہے

ادھر دیکھ او بے وفا بے مروت

سوا تیرے سارے حسینوں کو دیکھا

خنک بے نمک بے مزا بے مروت

گلا جور کا سن کے بولے تمہیں کیا

میں اہل مروت ہوں یا بے مروت

جفاؤں کا اس سے گلا کیجیئے جب

تو کہتا ہے وہ بے وفا بے مروت

چلو ڈھونڈھ لو باوفا اور کوئی

اگر میں ہوں نا آشنا بے مروت

قلقؔ اٹھ گئی رسم الفت جہاں سے

حسیں سب ہیں دنیا کے کیا بے مروت