کیا فاش کروں غم نہاں کو

کیا فاش کروں غم نہاں کو

پایاں نہیں میری داستاں کو

قصے کو نہ پوچھو میرے ہرگز

یارا ہی نہیں دل‌ و زباں کو

درپئے ہیں نصیحتوں کے یا رب

سمجھاؤں میں کیوں کے دوستاں کو

گو ہم نے سلایا جیب و داماں

کیا کیجئے گا چشم خوں فشاں کو

ہو گر نہ وہ شمع رو ہی تو پھر

کیا آگ لگاؤں دود‌ ماں کو

گزرا تھا ادھر سے کل جو شاید

آیا تھا وہ میرے امتحاں کو

آئے تو ابھی تھے میرے صاحب

ایسی جلدی چلے کہاں کو

اے یارو سمجھ کے بولو اس بن

میں جاؤں گا باغ و بوستاں کو

آصفؔ ابھی میں نے کیا کہا تھا

ٹک بند نہیں تری زباں کو