Rang Kahan Hai Saya Sa Hai

rang kahan hai saya sa hai

naqsh kahan hai dhoka sa hai

subh ki rangat zardi-mail

sham nahin hai dhaDka sa hai

dil ka KHun hua ho shayad

dur pare jo kohra sa hai

sail-e-ishq thama kab hoga

dariya hai aur chaDhta sa hai

lab us ke jo khulte dekhe

ek jahan kuchh hansta sa hai

asl mein naqsh-e-kaif-e-hasti

fani sa hai miTta sa hai

husn aur ishq hain donon kafir

donon mein ek jhagDa sa hai

aao pyar se dho len us ko

naqsh-e-jahan kuchh maila sa hai