Surat-e-zanjir Mauj-e-KHun Mein Ek Aahang Hai

surat-e-zanjir mauj-e-KHun mein ek aahang hai

aagahi ki had pe ek KHwab-e-junun ki jang hai

jaane kin chehron ki lau thi jaane kis manzar ki aag

nind ka resham dhuan hai KHwab shoala-rang hai

ek junun-KHane mein KHud ko DhunDhta hai aadmi

KHud-tawafi mein bhi KHud se sainkaDon farsang hai

kirm-KHurda kashtiyan binai ki hain tah-nashin

nam hawa se ustaKHwanon mein utarta rang hai

aag ko gulzar kar de us dua ka waqt hai

warna KHu-e-adamiyat aadmi par tang hai

bu-e-gul ruKHsat hui shayad ye ho KHatm-e-bahaar

TuTti lai mein bikharti saut-e-shab-ahang hai

ek markaz par ziden yakja hain aur gardish mein hain

ye zamane ka taghayyur aalam-e-nairang hai