Maine Chup Ke Andhere Mein KHud Ko Rakha Ek Faza Ke Liye

main ne chup ke andhere mein KHud ko rakha ek faza ke liye

hujra-e-zat mein raushni lane wali dua ke liye

be-sada saaton mein samaat ki raftar rukne ko thi

ek aahaT ne mujh se kaha jag jao KHuda ke liye

ek dushman-nazar meri narmi pe iman lane ko hai

main ajab intiha par khaDa hun kisi ibtida ke liye

koi KHush-qamati aaine ke muqabil sambhalti hui

koi tadbir-e-nazzara simTi hui ek ada ke liye

ek hairat se lipTi hui ek subuk-doshi-e-pairahan

muztarib hai achanak bichhaD jaane wali haya ke liye

ek safar hausle aur KHwahish ki tasdiq karta hua

ek raste pe madum hote hue naqsh-e-pa ke liye

meri aankhen aur in mein chamakte hue mustaqil faisle

jagmagate rahenge yunhi aane wali hawa ke liye

is se pahle ki manzil andheron mein tabdil hone lage

qafile se kaho rahnuma DhunD le rahnuma ke liye

wusat-e-asman subh-e-parwaz ka koi muzhda suna

shaKH-e-hasrat pe baiThe hue tair-e-be-nawa ke liye

ek bagh-e-talluq kisi chashm-e-hairan mein aabaad hai

ai KHuda is nazare ko sarsabz rakhna sada ke liye

'azm' is arsa-e-na-muradi se ghabra ke ye mat kaho

aisi be-rang si zindagi kis liye kis jaza ke liye