Charagh Ki OT Mein Hai Mehrab Par Sitara
charagh ki oT mein hai mehrab par sitara
ruka hua hai abhi gul-e-KHwab par sitara
ye kis rawani mein Dubti ja rahi hain aankhen
chamak raha hai ye kyun ruKH-e-ab par sitara
ruki hui hai zamin pani ke mintaqe par
Thahar gaya hai nigah-e-betab par sitara
kahin meri dhup ki hukumat hai aaine par
jhuka hua hai kahin zar-e-ab par sitara
muhit mein ghumte rahenge agar safine
siyah paDne lagega girdab par sitara
suna tha is raat ke muqabil bhi aaina hai
magar dikhai diya hai mahtab par sitara
main hun kisi raat ki siyahi ka rizq lekin
talash karta hun ru-e-ahbab par sitara
Ghulam Husain Sajid 
(1078) Peoples Rate This