Tishna-kaamon Ko Yahan Kaun Subu Deta Hai

tishna-kaamon ko yahan kaun subu deta hai

gul ko bhi hath lagao to lahu deta hai

neshtar aur sahi kar-e-digar aur sahi

dil-e-sad-chaak agar izn-e-rafu deta hai

tab-e-fariyaad bhi de lazzat-e-bedad bhi de

dene wale jo mujhe soz-e-gulu deta hai

hum to barbaad hue barg-e-KHizan ki surat

shaKH-e-gul kaun tujhe zauq-e-numu deta hai

munsifo hath se ab dashna-o-KHanjar rakh do

kya bura hai agar insaf adu deta hai

ai KHudawand mere sher ki qimat kya hai

ek roTi ka niwala jise tu deta hai