Tasawwur

is shahr mein sham hote hi galiyon ke nukkaD par

saDkon ke kinare zinda-dil log

aankhon ke kaTore liye khaDe ho jate hain

aur shaKH-e-gul ki tarah lachakti mahakti laDkiyan

husn ki KHairaat banTti phirti hain

KHub-surat tanau-mand bachche

phulon ki tarah muskuraate

ek hath mein khilaune

ek hath mein man ki ungli pakDe hanste-khelte guzarte hain

mai-kadon mein rind jam par jam lunDhate hain

gharon mein pakne wale khanon ki KHushbu

ishtiha ko tez karti hai

kitna KHub-surat kitna jaan-dar hai wo shahr jise meri band aankhon ke alawa

kisi aur ne nahin dekha