Us Se Mat Kahna Meri Be-sar-o-samani Tak
us se mat kahna meri be-sar-o-samani tak
wo na aa jae kahin meri pareshani tak
main to kuchh bhi nahin karti hun mohabbat ke liye
ishq wale to luTa dete hain sultani tak
kaise sahra mein bhaTakta hai mera tishna-lab
kaisi basti hai jahan milta nahin pani tak
naKHuda dekh chuka kali ghaTa ke tewar
baadban khol diye us ne bhi tughyani tak
pur-KHatar rah meri hone lagi hai aasan
KHauf kis ka hai bhala teri nigahbani tak
Indira Varma 
(825) Peoples Rate This