احسان سنگ و خشت اٹھا لینا چاہیے

احسان سنگ و خشت اٹھا لینا چاہیے

گھر اب کوئی نہ کوئی بنا لینا چاہیے

اتنی غلط نہیں ہے یہ واعظ کی بات بھی

تھوڑا بہت ثواب کما لینا چاہیے

حالات کیا ہوں اگلے پڑاؤ پہ کیا خبر

سپنا یا سنگ کوئی بچا لینا چاہیے

وہ رات ہے کہ سایہ بدن سے ہے منحرف

ہم کس جگہ کھڑے ہیں پتا لینا چاہیے

دشمن یا دوست کون کھڑا ہے پس غبار

جو سو رہے ہیں ان کو جگا لینا چاہیے

حسن بتاں کی بات ہی عظمیؔ چھڑی رہے

موسم کا کچھ نہ کچھ تو مزا لینا چاہیے