Apne Rahne Ka Thikana Aur Hai
apne rahne ka Thikana aur hai
ye qafas ye aashiyana aur hai
maut ka aana bhi dekha bar-ha
par kisi par dil ka aana aur hai
naz uThane ko uThate hain sabhi
apne dil ka naz uThana aur hai
dard-e-dil sun kar tumhein nind aa chuki
banda-parwar ye fasana aur hai
raat bhar mein sham-e-mahfil jal-bujhi
aashiqon ka dil jalana aur hai
hum kahan phir baghban gulshan kahan
ek do din aab-o-dana aur hai
bholi bholi un ki baaten ho chukin
ab KHuda rakkhe zamana aur hai
chhoD dun kyunkar dar-e-pir-e-mughan
koi aisa aastana aur hai
yar-e-sadiq DhunDte ho tum 'jalil'
mushfiq-e-man ye zamana aur hai
Jaleel Manikpuri 
(696) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544