رہرو سے سروکار نہ منزل کی خبر ہے

رہرو سے سروکار نہ منزل کی خبر ہے

دیوانۂ الفت ہے کہ سرگرم سفر ہے

واں چاہ نہیں ملتی ہے یاں چین نہیں ہے

تسکین دل زار ادھر ہے نہ ادھر ہے

ذرے ہیں کہ گرمائے ہوئے نور کے تارے

اک برق تپاں ہے کہ تری راہ گزر ہے

ایک ایک ادا ہوش طلب دشمن ایماں

وہ یوسف ثانی بخدا رشک قمر ہے

آ میرے جہاں میں مری دنیا کی تمنا

اب میری مرادوں کا جہاں زیر و زبر ہے

گم گشتہ منزل ہوں محبت میں کچھ ایسا

بکھرا ہوا شیرازۂ تسکین نظر ہے

جوہرؔ یہ غم راہ یہ دشواریٔ منزل

کہتا ہے مرا دل کہ قیامت کا سفر ہے