Dil-e-nalan Teri Aahon Mein Asar Hai Ki Nahin

dil-e-nalan teri aahon mein asar hai ki nahin

be-qarari jo idhar hai wo udhar hai ki nahin

shoala-e-ishq jigar tak to bhaDak uTTha hai

kuchh KHabar bhi tujhe ai dida-e-tar hai ki nahin

hum bataen tumhein is shoKH ke parda ka sabab

dekhna ye hai tumhein tab-e-nazar hai ki nahin

qais ye chaak-gareban to hai wahshat ki dalil

chaak-dil hai ki nahin chaak-jigar hai ki nahin

us ki surat se hun sanna-e-azal ka qail

jalwa-e-qudrat-e-haq husn-e-bashar hai ki nahin

kaba-e-dil pe mere rose chaDhai kaisi

ai buto kuchh tumhein allah ka Dar hai ki nahin

lan-tarani ko zara ghaur se samjho musa

jalwa-e-hashr tumhein madd-e-nazar hai ki nahin

dair mein DhunDhta hun kaba-nashin ko zahid

wahi jalwa jo udhar hai wo idhar hai ki nahin

qatl-e-ashiq to teri aankh ka jada Thahra

lab-e-isa ka tere lab mein asar hai ki nahin

mere phulon se bhi daman ko bachaya tum ne

is taghaful ki bhi kuchh tum ko KHabar hai ki nahin

shama ki nazr idhar jaan patangon ki hui

waqf-e-gul-gir idhar shama ka sar hai ki nahin

shab ko barse the mere dida-e-tar tham tham kar

subh ko dekhiye to ghair ka ghar hai ki nahin

hath KHali na dikhao pae qatl-e-dushman

tegh bhul aae to kya tegh-e-nazar hai ki nahin

dam to lene do nakirain thaka-manda hun

ruKH pe dekho to mere gard-e-safar hai ki nahin

nala-e-dil to mera shor-e-qayamat hai magar

nazuki teri mujhe madd-e-nazar hai ki nahin

ghuncha-e-dil se shab-e-gham ye sada aati thi

main hun pazhmurda kahin baad-e-sahar hai ki nahin

aatishin aah ka hai sang-dilon par bhi asar

toD kar dekh lo patthar mein sharar hai ki nahin

tur ki aag to bujhte hi bujhegi yarab

talib-e-did ko apni bhi KHabar hai ki nahin

sab se aage hai gunahgaron ki saf mahshar mein

qabil-e-naz mera daman-e-tar hai ki nahin

hum ne 'rasiKH' tujhe mahfil mein bahut yaad kiya

us ne puchha tha koi tufta-jigar hai ki nahin