دل تو پکا تھا مگر دل کی دلیلیں کچی

دل تو پکا تھا مگر دل کی دلیلیں کچی

لے گریں پختہ عمارت کو فصیلیں کچی

آ گئے رنگ کے دھوکے میں زمانے والے

سرخ پھولوں پہ جھپٹتی رہیں چیلیں کچی

آ گئی بات سر بزم زباں پر دل کی

تو نے ہونٹوں پہ جڑیں ضبط کی کیلیں کچی

کچے انگور کی اک بیل بدن ہے اس کا

اور آنکھیں ہیں مئے ناب کی جھیلیں کچی

لے اڑے ابر کے ٹکڑوں کو ہوا کے جھونکے

سوکھ کر بیٹھ گئیں خاک میں جھیلیں کچی

پھر پلٹ آئیں گے سیرتؔ یہ جنوں کے موسم

دھجیاں جیب و گریبان کی سی لیں کچی