Roya Karenge Aap Bhi Pahron Isi Tarah

roya karenge aap bhi pahron isi tarah

aTka kahin jo aap ka dil bhi meri tarah

aata nahin hai wo to kisi Dhab se daw mein

banti nahin hai milne ki us ke koi tarah

tashbih kis se dun ki tarah-dar ki mere

sab se nirali waza hai sab se nai tarah

mar chuk kahin ki tu gham-e-hijran se chhuT jae

kahte to hain bhale ki wa-lekin buri tarah

ne tab hijr mein hai na aaram wasl mein

kam-baKHt dil ko chain nahin hai kisi tarah

lagti hain galiyan bhi tere munh se kya bhali

qurban tere phir mujhe kah le usi tarah

pamal hum na hote faqat jaur-e-charKH se

aai hamari jaan pe aafat kai tarah

ne jae wan bane hai ne bin jae chain hai

kya kijiye hamein to hai mushkil sabhi tarah

mashuq aur bhi hain bata de jahan mein

karta hai kaun zulm kisi par teri tarah

hun jaan-ba-lab butan-e-sitamgar ke hath se

kya sab jahan mein jite hain 'momin' isi tarah