تجھے ذرا دکھ اور سسکنے والا میں

تجھے ذرا دکھ اور سسکنے والا میں

تری اداسی دیکھ نہ سکنے والا میں

ترے بدن میں چنگاری سی کیا شے ہے

عکس ذرا سا اور چمکنے والا میں

ترے لہو میں بیداری سی کیا شے ہے

لمس ذرا سا اور مہکنے والا میں

تری ادا میں پرکاری سی کیا شے ہے

بات ذرا سی اور جھجکنے والا میں

رنگوں کا اک باغ حسیں چہرہ تیرا

کیا کیا دیکھوں آنکھ جھپکنے والا میں

سنگ نہیں ہوں بات نہ مانوں موسم کی

ہوا ذرا سی اور لچکنے والا میں

سفر میں تنہا قدم اٹھانا مشکل ہے

ساتھ تمہارے کبھی نہ تھکنے والا میں