یار کے رخ نے کبھی اتنا نہ حیراں کیا

یار کے رخ نے کبھی اتنا نہ حیراں کیا

فکر سر زلف نے جیسا پریشاں کیا

ایسا کسی سے جنوں دست گریباں نہ ہو

چاک گریباں کا بھی چاک گریباں کیا

کر چکا تھا زہر رشک پردے میں کار اپنا لیک

تیغ جدائی نے زور کار نمایاں کیا

عشق ترے ہاتھ سے تو ہی بتا کیا کریں

وصل میں حیراں کیا ہجر میں گریاں کیا

عیش و غم باغ دہر وہم ہے ٹک گل کو دیکھ

چاک کیا تو کہے میں کہوں خنداں کیا

اس کا چراغ مراد رہیو فروزاں مدام

داغوں سے دل کو میرے جس نے چراغاں کیا

عشق کی کیا تربیت تجھ سے کہوں اے رضاؔ

آہ کو نالہ کیا نالے کو افغاں کیا