کشت ویراں کی طرح تشنہ رہی رات مری

کشت ویراں کی طرح تشنہ رہی رات مری

لوٹ آئی ترے در سے بھی مناجات مری

تو لہو بن کے رگوں میں مری دوڑا لیکن

تشنۂ دید رہی تجھ سے ملاقات مری

دل پہ کھلتے نہیں اسرار وجود اور عدم

یہی حیران نگاہی ہے مکافات مری

کون سمجھا مری بیدار نگاہی کی حدود

یوں تو ہر ہاتھ میں تھی شرح حکایات مری

گرچہ آوارہ رہے میرے فسانے ہر سو

راز سر بستہ زمانے میں رہی ذات مری

ساز‌ و آہنگ کا اعجاز تھا ہر لفظ مرا

پھونک ڈالی خس و خاشاک نے سوغات مری

ہیں زمیں اور زماں دود چراغ شب غم

مجھ کو لے آئی کہاں گردش حالات مری