آ کہ ہستی بے لب و بے گوش ہے تیرے بغیر

آ کہ ہستی بے لب و بے گوش ہے تیرے بغیر

کائنات اک محشر خاموش ہے تیرے بغیر

آ کہ پھر دل میں نہیں اٹھتی کوئی موج نشاط

سرد پانی بادۂ سر جوش ہے تیرے بغیر

نیند آ آ کر اچٹ جاتی ہے تیری یاد میں

تار بستر نشتر آغوش ہے تیرے بغیر

جلوۂ ہر روز جو ہر صبح کی قسمت میں تھا

اب وہ اک دھندلا سا خواب دوش ہے تیرے بغیر

زندگی تجھ سے عبارت تھی مگر جب تو نہیں

زندگی کا اپنی کس کو ہوش ہے تیرے بغیر

آ کہ موضوع غزل کو ڈھونڈھتی ہے ہر نگاہ

نغمۂ مطرب بلائے گوش ہے تیرے بغیر

کیا خبر سیمابؔ کب گھبرا کے دے دے اپنی جان

ضبط گو اب تک تحمل کوش ہے تیرے بغیر