قفس میں رہ کے گل و نسترن کی بات کرو

قفس میں رہ کے گل و نسترن کی بات کرو

چمن سے دور ہو لیکن چمن کی بات کرو

ابھی تو جذب محبت کی آزمائش ہے

فروغ عشق کی دار و رسن کی بات کرو

جلے شباب کے طوفاں میں شمع تقویٰ کیا

بہار نو کی شراب کہن کی بات کرو

خلاف مسلک الفت ہے شکوۂ ساقی

نہ تشنہ کامئ کام و دہن کی بات کرو

یہاں فسانۂ دیر و حرم سے کیا حاصل

یہاں تو ساقئ ایماں شکن کی بات کرو

عجب نہیں کہ قفس سے رہ چمن نکلے

اسیر رہ کے بہار چمن کی بات کرو

سکوت و گوشہ نشینی سے قادریؔ حاصل

سخن وروں میں کمال سخن کی بات کرو