ہر پری وش کا اعتبار کرو

ہر پری وش کا اعتبار کرو

زندگی صرف انتظار کرو

ہم سے نفرت کرو کہ پیار کرو

کوئی رشتہ تو استوار کرو

ہم ہیں لذت کش گناہ وفا

دوستو ہم کو سنگسار کرو

زندگی ہو کہ مے کہ سچائی

تلخ جو شے ہو اس سے پیار کرو

ہر جنم پر بیاد سرو قداں

جاں سپرد فراز دار کرو

اپنے دامن کی چند کلیوں سے

تم نہ اندازۂ بہار کرو

گل کے مانند چاک چاک ہو دل

اتنا شائستۂ بہار کرو

ہم سفر جب بھی ہو نگار غزل

روش خاص اختیار کرو