یاد کے شہر مری جاں سے گزر

یاد کے شہر مری جاں سے گزر

قرب کے آخری امکاں سے گزر

جل بجھی تھی میں ترے کھلنے تک

اب مری خاک پریشاں سے گزر

عکس بننے لگا صحرا تیرے

میرے سورج رخ تاباں سے گزر

زخم گر میرے ہو کچھ اور عطا

ہاں عبث نشتر و پیکاں سے گزر

اٹھ چکیں گل سخنی کی رسمیں

گوش جاں حرف بہاراں سے گزر

آخری لو نہ بجھا جائے کہیں

شب جاں میں رکے مہماں سے گزر

اے مرے ابر مری مٹی کی

تشنگی پر سر مژگاں سے گزر

آنکھ اب تیرگیٔ غم سے بجھی

اشک خوں جشن چراغاں سے گزر