مری بیاض کو شعروں سے تم سجا دینا

مری بیاض کو شعروں سے تم سجا دینا

میں ایک وہم ہوں مجھ کو یقیں بنا دینا

بنا کے کوئی کہانی ہماری ہستی کی

ندی میں کاغذی کشتی کوئی بہا دینا

بہت سنبھال کے رکھا ہے میں نے پھولوں کو

جو ہو سکے انہیں گلدان میں سجا دینا

چلا گیا جو کبھی لوٹ کر نہیں آیا

میں لوٹ آؤں گی مجھ کو ذرا صدا دینا

اندھیرا ڈھونڈھتا رہتا ہے میری پرچھائیں

جلے چراغ تو چادر مجھے اوڑھا دینا

کتابیں سو نہیں پائیں گی میرے بعد کبھی

ہوا تو آ کے انہیں لوریاں سنا دینا

بکھر کے رہ گئی ذرات غم میں شائستہؔ

ترے قلم سے نئی شکل اک بنا دینا