بیگانہ ہو کے بزم جہاں دیکھتا ہوں میں

بیگانہ ہو کے بزم جہاں دیکھتا ہوں میں

دنیا کے رنگ و بو کا سماں دیکھتا ہوں میں

روشن ضمیر جیسے کوئی صرف دید ہوئے

یوں جلوہ ہائے کون و مکاں دیکھتا ہوں میں

ارزاں ہے ظلم و جور کی افتادگی مگر

جنس‌ و‌ وفا و مہر گراں دیکھتا ہوں میں

اک سمت جشن شادی و ہنگامۂ نشاط

اک سمت حشر آہ و فغاں دیکھتا ہوں میں

شرح الم دراز ہے القصہ اے شکیلؔ

اک داغ اپنے دل میں نہاں دیکھتا ہوں میں