حسرت زہرہ وشاں سرو قداں ہے کہ جو تھی

حسرت زہرہ وشاں سرو قداں ہے کہ جو تھی

اپنا سرمایۂ دل یاد بتاں ہے کہ جو تھی

کج کلاہوں سے بھی شرمندہ نہ ہونے پائے

ہم میں وہ جرأت اظہار بیاں ہے کہ جو تھی

وضع داری میں کوئی فرق نہ آیا سر مو

وہی آوارگیٔ کوئے بتاں ہے کہ جو تھی

میں نے سرمایۂ دل نذر بتاں کر ڈالا

میرے ناصح کو مگر فکر زیاں ہے کہ جو تھی

میری آشفتہ مزاجی مری شوریدہ سری

اب بھی مقبول حسینان جہاں ہے کہ جو تھی

شوقؔ تقدیر نے کروٹ بھی نہ بدلی اب تک

زندگی اب بھی وہی سنگ‌ راں ہے کہ جو تھی