خود فرشتے تو نہیں ہیں جو مجھے لے جا رہے ہیں

خود فرشتے تو نہیں ہیں جو مجھے لے جا رہے ہیں

بندے مجھ کو کیوں خدا کے سامنے لے جا رہے ہیں

دل جگر شاہوں کے آگے کس لئے لے جا رہے ہیں

رت قصیدوں کی ہے اور ہم مرثیے لے جا رہے ہیں

ہم بھی دو اک شعر لے چلتے ہیں تیرے چشم و لب سے

پھول بھی خوشبو تجھی سے مانگ کے لے جا رہے ہیں

کندھا دیتے چل رہے ہیں راستے والوں کو بھی ہم

اپنی میت کو بھی ہم کس شان سے لے جا رہے ہیں

آج پہلی بار توبہ کا ارادہ ہو رہا ہے

شیخ صاحب آج ہم کو میکدے لے جا رہے ہیں